Dhunë dhe gjak mes gjimnazistëve

Shef Krimesh Numri i postimeve : 769 Registration date : 21/02/2008

Rrahje barbare mes të rinjsh në Tiranë. Tronditet opinioni publik. Xhirimet përhapen me shpejtësi në internet

Sekuenca nga një sherr masiv në një nga rrugët e Tiranës u publikuan së fundi në faqen popullore youtube.com duke tërhequr vëmendjen dhe komentet e një numri të madh lexuesish anekënd botës të shokuar nga niveli i egërsisë dhe karakteri shtazarak që paraqitet në xhirime.

Pamjet tronditëse të denja për një film hollivudian me efekte speciale përmbajnë dhunë të nivelit sipëror, gjak, sharje të rënda, mungesë të thellë humanizmi dhe civilizimi duke u shndërruar në një episod të rrallë dhe të pashembullt për asnjë vend tjetër nisur nga mënyra sesi ndodh rrahja në mes të ditës, në mes të rrugës, pa shqetësuar askënd. Ngjarja për të cilën opinioni publik në Shqipëri, autoritetet e forcave të rendit ose qoftë edhe ato shkollore, nuk kanë as dijeninë më të vogël, duket se është filmuar ndoshta pranë ambienteve të ndonjë shkolle, përmes një aparati celular ose ndonjë kamera tjetër amatore dhe më pas është publikuar në internet ne adresen: https://www.youtube.com/watch?v=_IklluQgO40 duke gjetur një përhapje të menjëhershme. Sipas informacioneve të “Korrieri”-t, asnjë denoncim apo ndonjë hetim i pavarur nuk është ndërmarrë nga strukturat vendore, ndonëse sipas imazheve dhe veshjes së protagonistëve të përfshirë në këtë episod duket se ngjarja ka të paktën një muaj që ka ndodhur.

Bëhet fjalë për një rrahje barbare të një të riu nga një grup i madh adoleshentësh, teksa origjina e konfliktit mbetet ende e paqartë.

Gjithçka ndodh përpara syve të një numri të konsiderueshëm kalimtarësh, nxënësish dhe të pranishmish të tjerë teksa është lehtësisht e kuptueshme që ngjarjet zhvillohen në Tiranë, për shkak të targave të automjeteve të parkuara në vendin e agresionit.

Protagonistët në ngjarje janë - mesa kuptohet nga imazhet - ndoshta nxënës të ndonjë gjimnazi dhe teksa i riu i nënshtrohet një dhune të egër nga bashkëmoshatarët e tij, dallohet sesi autori i videos dhe shumë kalimtarë vërejnë gjithçka, komentojnë me indiferencë, por nuk ndërhyjnë aspak për të ndërprerë këtë akt shtazarak.

Nuk njihet identiteti i viktimës, por në video dëgjohen zëra të rinjsh që thërrasin njëri tjetrin në emër. Në një moment të caktuar viktima që është vënë poshtë gjashtë apo shtatë agresorëve, shkëputet duke u munduar të shpëtojë dhe përpara objektivit shfaqet një fytyrë e përçudnuar nga rrahja dhe një hemoragji e fortë teksa të pranishmit komentojnë me njëri tjetrin: “shiko, gjak”.

Imazhet dramatike nuk ndalojnë këtu dhe sherri zhvendoset në një ambient tjetër, por videoamatori ka vazhduar xhirimet i tërhequr nga një tjetër sherr paralel në po atë vend, që më parë nuk i kishte ngjallur interes ndoshta për shkak të intensitetit më të ulët të dhunës dhe mungesës së hematomave. Paralelisht me djemtë, në të njëjtën arenë përleshjesh zhvillohet edhe një rrahje midis një grupi vajzash bashkëmoshatare teksa nuk kuptohet nëse motive i grindjes me tyre është po ai i djemve thirrjet e të cilëve dëgjohen në sfond duke të lënë të kuptosh se skena të tmerrshme po zhvillohen në prapaskenë aty ku nuk arrin dot objektivi i kameras amatore.

Prej kohësh ambientet shkollore në Shqipëri janë shndërruar në çerdhe shthurjeje për shkak të kujdesit të ulët, investimeve të pakta, lënies pas dore dhe një sistemi edukativ tërësisht të degraduar. Tirana me një popullsi ndoshta të trefishuar në krahasim me atë të viteve 90, ka pothuajse të njëjtin numër gjimnazesh duke i shndërruar ambientet shkollore në geto të pamjaftueshme, të ngushta e të mbipopulluara që krijojnë premisat e duhura jo vetëm për mos-arsimimin e duhur të fëmijëve të taksapaguesve publikë, por edhe për shndërrimin e tyre në embrione kriminelësh, të paedukuarish, të dhunshmish dhe të shthururish. Stafet e pamjaftueshme pedagogjike, klasat me nga 50 nxënës e lart, mësimi me turne, pamundësia për të mbajtur nën kontroll mjediset brenda shkollës dhe në fund të fundit shndërrimi i vetë shkollës si institucion në një mjedis aspak interesant për t’u ndjekur, i ka shndërruar frekuentuesit e tyre vit pas viti dhe brez pas brezi në turma ku përherë e më të paktë janë ata që ia dalin t’i shpëtojnë një stili jetese ku predominon dhuna, seksi premature, droga, alkooli dhe vese të tjera të dëmshme. Për këtë arsye, video si kjo e publikuar së fundi, mund të shkaktojnë irritim tek një shikues i një breznie tjetër, apo i një vendi “normal”, por janë tashmë një rutinë e përditshme për qindra dhe mijëra adoleshentë shqiptarë që popullojnë sot shkollat e mesme publike të këtij vendi ku publikja është lënë në degradim të plotë.

Precedenti

Vetëm pak muaj më parë, ishte përsëri interneti distributori masiv i një tjetër skene tronditëse ku shfaqej një adoleshente ndoshta e mitur shqiptare teksa pozonte duke u zhveshur përpara objektivit, pa ndjerë asnjë lloj brerje ndërgjegje dhe tërësisht e pavetëdijshme për atë që po bënte.

Skenat u mohuan nga gjimnaze të ndryshme në kryeqytet se i përkisnin ndonjërës prej nxënësve të tyre, por në mjediset e ngushta midis adoleshentëve kryeqytetas, protagonistja njihet me emër dhe madje siç komentohet, është shndërruar në një lloj ikone në artin e ri modern të publikimit të imazheve të nxehta në internet, një garë e re popullore midis të rinjve shqiptarë.

Teknologjia e re e informacionit, telefonat celularë me aksesorë fotografikë apo filmikë, të cilët tashmë janë në dorën e cilitdo, e kanë shkurtuar shumë distancën nga imagjinata deri tek realizimi. Shpesh, adoleshentët të cilët përjetojnë moshën e tyre më delikate në këtë shpërthim të paprecedenttë të teknologjisë dixhitale, janë protagonistët dhe iniciatorët e pavetëdijshëm të skenave të forta me përmbajtje kryesisht dhune dhe seksi, ndërsa audienca e tyre tashmë edhe me ndihmën e internetit është përherë e më globale duke dalë nga oborri i shkollës, unaza e Tiranës e madje edhe kufiri i Shqipërisë.

Numri i postimeve : 12 Registration date : 12/04/2008

Skena barbare por qe per mendimin tim nuk ndodhin vetem ne Shqiperi madje ne vende te zhvilluara kemi pare shume me keq, vrasje ne shumice dhe me arme!!!

Por ne Shqiperi kjo gjendje nuk me habit shume, fatkeqesisht, sepse kur nuk ka shtet dhe edukim nuk mund te kete sjellje normale dhe te arsyeshme nga rinia e sila pret nga ata qe e edukojne dhe i japin kufinjte ne jete qe te sillen mire, kjo gje nuk egziston ose me mire te them qe menyra e edukimit ka ndryshuar jashte mase keto 17-18 vjetet e fundit!!!